Dei siste hendingane i Sogn med brann i tunnel, ulykke med buss, bussdrap og brann har synt oss kor viktig det er for samfunnsberedskapen at ein har lokalsamfunn med robuste lokalsjukehus som kan gi rask og stabiliserande behandling når ulykka er ute.
Desse tragiske hendingane har synt at lokalkunnskap, god kommunikasjon på veg, i luft og samband er svært viktig når ei krise oppstår. Lokalsjukehuset i Lærdal har vore eit heilt naudsynt og viktig samlingspunkt i desse alvorlege hendingane. Lærdal sjukehus har klart å administrere og behandle eit stort tal pasientar på kort tid, og vore eit viktig knutepunkt for naudsynt kommunikasjon.
Nordfjord sjukehus er no i sluttfasen av prosjektet som skal definere lokalsjukehusa i framtida. Sogn og Fjordane Venstre meiner det er viktig at lokalsjukehus i framtida har eit tilbod om kirurgisk aktivitet, slik mange fagmiljø utafor Helse Førde meiner. Dette er også konklusjonen i rapporten "Utviklingsprosjekt framtidas lokalsjukehus". Dagkirurgi må på plass ved Nordfjord sjukehus, slik det er ved alle lokalsjukehus i landet, noko som også er i tråd med faglege tilrådingar nasjonalt.
Fødetenestene i fylket er lagt om, og Sogn og Fjordane Venstre meiner dette må vurderast på nytt. 16 transportfødslar på under 1000 fødslar er altfor mykje.