Leiaren av Luster AP har i sitt avisinnlegg 15.12.2014 gitt underteikna eit «kick» til å målbera Luster Venstre sine synspunkt på arealplanen utlagt til høyring. Møteprotokollar frå formannskapet viser delvis Venstre sine innvendingar og særstandpunkt på framlegget til arealplanen. I formannskapet hadde Venstre innvendingar til både helikopterlandingsplass og plassering av gondolbane i Skjolden. Venstre ønskjer ikkje helikopterlandingsplassen og etter Venstre sitt syn er det eit «overgrep» overfor innbyggarane og Skjolden bygdesenter å føra gondolbana direkte frå cruisekaien til Bolstadnosi. Venstre meiner starten på gondolbana må flyttast til «utkanten» av bygdesenteret ved fylkesvegen/Nymoen leirplass med rimeleg gangavstand frå kaien. Plassering vidare «oppover» mot Vassbakken/Fortun kan også vera eit alternativ å vurdera. Under handsaminga i formannskapet fekk Venstre ingen støtte, så ved neste handsaming vil det bli interessant å avklare om avisinnlegget til Johannessen er «etterpåklokt» soloutspel, eller om AP-sine formannskapsmedlemar vil støtte Venstre for meir omsyn til fastbuande i Skjolden og overordna mål for turisme/ næringsverksemd i kommunen der ein også tek meir omsyn til dyrka mark, miljø og sårbar natur.
Underteikna hadde ikkje høve til å delta på siste folkemøte i Gaupne, men av referat registrerer eg med glede mange av dei kritiske synspunkta til arealplanen (stor nedbygging av dyrka mark, inngrep i sårbar natur/ friluftsområde osv.). Venstre oppmodar sterkt alle innbyggarar om å kome med sine merknadar/synspunkt til utlagt arealplan og håpar her å finne støtte for fleire synspunkt Venstre var åleine om i formannskapet. Venstre sitt mål er ein meir berekraftig arealplan enn den formannskapet har lagt ut til høyring.
Jon Ove Lomheim
– formannskapsmedlem for Venstre –