– Greitt at nye Sogndal har gått inn mellombels leigeavtale i Statens hus, men vi vil ha saka om permanente lokale raskt på sakskartet no framover. Dersom beslutninga om permanente lokale for kommuneadminstrasjonen i Leikanger dreg ut, vil dette berre gje uro, seier ordførarkandidat Trude Risnes, 2. kandidat Bjarte Haugen, og Are Kvistad, 5. kandidat og leiar i Sogndal Venstre.
I politisk plattform for nye Sogndal kommune er det bestemt at Leikanger skal vere administrasjonssenter i den nye kommunen. Politisk og administrativ leiing skal lokaliserast her. Plattformen seier også at ikkje-stadbundne tenester skal fordelast til eksisterande kommunesentra, og at tal arbeidsplassar i kommunehuset i Balestrand skal vere minst på dagens nivå. Tinghuset, dagens kommunehus på Leikanger, er lite tilgjengeleg og det er krevjande å gjere endringar og nødvendige utvidingar for å ivareta framtidsretta løysingar for eit framtidig kommunehus på Leikanger. Prosjektet og Fellesnemnda sette difor saka på kartet i fjor haust.
Fellesnemnda ba først om ei utgreiing av kontorbehovet for administrative stillingar og bruk av eksisterande administrasjonsbygg i Balestrand, Leikanger og Sogndal frå 2020. Vidare ga Fellesnemnda prosjektrådmannen fullmakt til å forhandle med aktuelle aktørar, for å sikra nye Sogndal kommune tenlege lokale for administrasjonen i Leikanger.
I desember fekk Fellesnemnda saka på nytt. Prosjektrådmannen tilrådde Fellesnemnda å inngå mellombels leigeavtale i Statens hus på inntil 5 år. Utgreiinga slo fast at vidare kartlegging og betre oversikt etter innplassering i organisasjonen var nødvendig, for å vite meir om det framtidige kontorbehovet og den endelege løysinga for administrasjonslokale i Leikanger. Eit fellesframlegg frå ordførar Jon Håkon Odd og Venstre ønskte ikkje å utsette saka, men føreslo å starte tingingar om administrasjonslokale i nybygg på sentrumstomta Fjordheim. Framlegget la til grunn at ei intensjonsavtale ville kunne handtere behovet for nærare arealspesifikasjonar. Framlegget fall med 7 stemmer (2 AP, 2 Venstre, 1 H, 1 Sp, 1 SV). Med eit fleirtal på 11 blei det vedteke å gå inn leigeavtale på Statens hus, og at det i løpet av perioden skulle gjerast vurderingar for ei framtidsretta løysing for lokalisering på Leikanger.
Ei mellombels leigeavtale i Statens hus er no signert. Leiargruppe og mellomleiarar er i all hovudsak på plass, og dei fleste tilsette er under innplassering. Sogndal Venstre meiner at det då er på tide å avklare kva den framtidsretta lokaliseringa for administrasjonssenteret i den nye kommunen skal vere. Dette er eit spørsmål dei tilsette også er opptekne av. Det same er innbyggjarane, særleg i Leikanger. Dei fryktar at det heile skal renne ut i sanden og at Leikanger står att med ein administrasjonssenter-status utan innhald.
– Sogndal Venstre er klare på kva vi meiner: Leikanger er administrasjonssenteret i nye Sogndal kommune. Lokalisering av administrasjonen i Statens hus er kun mellombels, og bør vere så kort som mogeleg. Om den framtidsretta løysinga skal vere i kommunens eige, eller med langtids leigekontrakt, er ikkje det viktigaste. Vi meiner begge løysingar kan vere aktuelle, og at det finst konkrete alternativ i sentrumsområdet på Leikanger i dag. Det handlingsrommet må nye Sogndal no ta!
Sogndal Venstre forventar at dei ulike ordførar- og partikandidatane og nytt kommunestyre er klare til å drive fram denne saka. Vi vil ha avklaringar rundt «den framtidsretta løysinga» for administrasjonslokalet, og vi vil ha ei løysing i tråd med den politiske plattformen.
Intensjonane er klare og organisasjonen er på plass. Vi ser ingen grunn til å legge denne saka på is og dra spørsmålet langt ut i perioden. Det vil berre skape uro. No er det tid for å ta ei beslutning.
Sogndal Venstre
Trude Risnes – ordførarkandidat
Bjarte Haugen – 2. kandidat
Are Kvistad – 5. kandidat og leiar