Mellom anna NRK melder i dag at Venstre i brev til lovavdelinga i Justisdepartementet har bede om ei utgreiing av forslaget om obligatorisk borgarleg vigsel. Stortinget handsamar som kjent forslaget til ny ekteskapslov. Då det var høyring om den nye lova i Stortinget, bad mellom anna Norges Kristne Råd, som representerer alt frå pinsevenner til katolikkar, uttrykk for at Venstres ordning er ein god idé.
Sjølvsagt med likebehandling
– For eit liberalt parti er det sjølvsagt at eit samfunn behandlar menneske likt uavhengig av seksuell legning, seier Skei Grande.
– Samstundes vil vi ikkje ta fra kyrkja den fridom dei har i dag til å ikkje vie homofile. Det bør vere opp til det enkelte tros- og livssynsamfunn å halde eigne ekteskapsseremoniar. Vi må sjå at ekteskapet ikkje berre er ein religiøs institusjon, men også ein juridisk, seier Skei Grande.
Jusshjelp
I brevet til departementet har venstre sin nestleiar bedt om lovteknisk støtte til å formulere ei alternativ lovtekst basert på eit felles juridisk giftarmål.
I brevet heiter det mellom anna: "Venstre ønsker å skille det juridiske og seremonielle ved inngåelse av ekteskap. En slik løsning vil innebære at Staten legger de juridiske rammene ved en borgelig vielse, mens det enkelte tros- og livssamfunn foretar velsignelse og/eller avholder egne ekteskapsseremonier for de som ønsker det."
Trine Skei Grande trur Venstre får gjennomslag for modellen sin.
– Den er ryddig, rettferdig og den skaper respekt for at tru også er knytt til synet på ekteskapet si rolle i samfunnet, seier ho.