Det vart halde to nominasjonsmøte i Vestland Venstre laurdag 13. februar – eit møte for kvar valkrins i fylket.
Kort om Sogn og Fjordane valkrins:
Sogn og Fjordane hadde eit kort møte, der alle voteringar var samrøystes.
Alfred Bjørlo uttaler følgande om å vere toppkandidat i Sogn og Fjordane:
– Min viktigaste motivasjon for å stille til val til Stortinget for Venstre i 2021, er at eg er 100% distriktsoptimist, seier Alfred Bjørlo. – No trengs meir enn nokon gong tydelege, tøffe politikarar som «brøytar veg» for ein ny og moderne distriktspolitikk nasjonalt. Eg brenn for at langt fleire enn i dag skal oppdage kor gode kvardagsliv det går an å leve utanfor dei største byane. Vi som bur i Sogn og Fjordane er plassert midt i smørauget for det nye, grøne næringslivet som vil vekse i åra framover. Då må staten og sentralmakta i Oslo vere med på laget: Statlege arbeidsplassar og utdanning må desentraliserast, vi må gjere livet enklare for dei som startar og driv små bedrifter – og vi må gje folk meir fridom og større armslag i kvardagen, seier Venstres nye listetopp Alfred Bjørlo.
Alfred Bjørlo har vore ordførar i Eid/Stad sidan 2011 og sit i Fylkesutvalet i Vestland for Venstre. Han har tidlegare m a vore politisk rådgjevar i Samferdsledepartementet og Næringsdepartementet, og dagleg leiar i næringsselskapet Måløy Vekst.
Gunhild Berge Stang (46), Fjaler, er vald som 2. kandidat og ungdomskandidat Ole Martini (21) frå Stad har fått 3. plassen på lista i Sogn og Fjordane valkrins til stortingsvalet 2021.
Kort om Hordaland valkrins:
Her var det ei kampvotering på første plass, der Sveinung Rotevatn gjekk sigrande ut med 41 stemmer mot 38 stemmer til Terje Breivik.
Sveinung Rotevatn uttaler følgande om det å vere toppkandidat i Hordaland. «Ei stemme på Venstre er den sikraste stemma for å sikre full fart i det grøne skiftet, for liberale verdiar og for ein skule som er god og trygg for alle elevar. Eg håpar på tillit frå veljarane i Hordaland til hausten, og gler meg til å stå på i valkampen saman med dei andre dyktige kandidatane på lista.»
Sveinung Rotevatn sat på Stortinget for Sogn & Fjordane frå 2013 til 2017. Han har seinare vore statssekretær i fleire departement. No er han Klima- og miljøminister i regjeringa Solberg. Han har òg vore leiar i Unge Venstre og kommunestyrerepresentant i Eid.
Rotevatn er ein markant rikspolitikar for Venstre. Han har godt oversyn over dei viktigaste politikkområda for partiet, og er ein sterk debattant. Han vart vald til nestleiar i Venstre i 2020.
Ane Breivik (22) frå Bergen er 2. kandidat og Geir Angeltveit (31) frå Stord fekk 3. plassen på Venstre si Stortingsvalliste i Hordaland Valkrins.
Her er begge listene:
Stortingsvalliste for Venstre i Sogn og Fjordane valkrins 2021:
- Alfred Bjørlo, (48) Stad
- Gunhild Berge Stang, (46) Askvoll
- Ole-Ansger N. Martini, (21) Unge Venstre/Stad
- Trude Risnes, (49) Sogndal
- Dina Bovim, (18) Unge Venstre/Kinn
- Torstein Tvinnereim, (50) Stryn
- Elias Slåtten, (19) Unge Venstre/Sunnfjord
- Kjetil Melheim, (41) Luster
- Helle Frogner, (46) Stad
- Jan Henrik Nygård, (59) Kinn
Stortingsvalliste for Venstre i Hordaland valkrins 2021:
- Sveinung Rotevatn, (33) Bergen
- Ane Breivik, (22) Unge Venstre/Bergen
- Geir Angeltveit, (32) Stord
- Ingrid N. Fjeldstad, (37) Bergen
- Petter S. Ulriksen, (44) Ullensvang
- Agnes H. Bernes, (26) Alver
- Børge Haugetun, (39) Øygarden
- Miriam L. Seim, (25) Alver
- Julie S. Andersland, (43) Bergen
- August Simonsen, (23) Bergen
- Heine Johansen, (35) Bergen
- Åsta Årøen, (49) Bergen
- Arild Raftevoll, (52) Askøy
- Elin Seim, (39) Voss
- Marius H. Hindenes, (19) Alver
- Kjersti I. Vevatne, (50) Osterøy
- Erlend A. Horn, (33) Bergen
- Astrid Dale, (67) Bjørnafjorden
- Geir Kjell Andersland, (72) Bergen
- Vanja Espeland, (46) Bømlo
- Kari Østervold Toft, (65) Øygarden