Bøndene på Vestlandet står for kunnskap, yrkesstoltheit, matvaresikkerheit og forvaltning av norsk kulturarv. Landbruket handlar om å skaffe på bordet den maten som vi treng kvar einaste dag – og som i framtida må sikrast endå meir nært og endå meir reint og klimavenleg enn i dag. Landbruket er ei spesiell næring i den forstand at ho må drivast og utviklast i eit livstid-perspektiv. Det å vere bonde er eit yrke du ikkje kan «hoppe inn og ut av» ettersom tidene er dårlege eller gode.
Vestland Venstre meiner landbruksnæringa må opp på eit inntektsnivå som speglar både ansvar, utvikling, yrkessituasjon og arbeidsmengde. Vi ønskjer eit jordbruksoppgjer i 2021 som reelt reduserer inntektsgapet til andre yrkesgrupper, som legg til rette for eit aktivt landbruk over heile landet og der det kjem på plass ein god investeringspakke for overgang til lausdrift for kjøt- og mjølkeproduksjon. Vi oppmodar Venstre si stortingsgruppe til å medverke til ei løysing som sikrar dette når jordbruksoppgjeret no skal handsamast på Stortinget.