Heidersmannen, liberalaren og partikollegaen vår Hans Carl Tveit er gått ut av tida, berre dagar før han ville fylt 69 år.
Sjølv om han har vore ute av politisk aktivitet i nokre år no, er han framleis ein som vert omtala med respekt og varme. Som ung mann var han aktiv i Det liberale folkepartiet, men tok med seg sitt store engasjement inn i Venstre etter samanslåinga i 1988.
Hans Carl var ein bergenspolitikar, men hadde og eit stort engasjement for resten av Hordaland. Då heile fylkestingsgruppa for til Oslo etter det gode valet i 1997, var det Hans Carl som fekk rollen som gruppeleiar. Den rollen fylde han med stort engasjement og mykje politisk erfaring. Han var og styremedlem og nestleiar i Hordaland Venstre i ei årrekkje rundt tusenårsskiftet.
Me minnest ein ekte bergensk ‘gentleman’, kunnskaprik med gode replikkar og alltid glad i ein god debatt. Takk for alt du har vore for oss som fekk gleda av å vere på lag med deg, Hans Carl. Du lever i minnet!
