Ungdomsklubbane er ein viktig del av kvardagen til mange unge. Dei er møteplassar, trygge rom og arenaer for deltaking og meistring. Kven veit betre enn ungdom sjølve kva som fungerer – og kva som trengst – i tilbodet til dei unge? Når kommunen no skal fordele midlar mellom ulike ungdomsklubbtilbod, er det berre rett og rimeleg at ungdommen sjølv får ein plass rundt bordet.
Kommunedirektøren foreslår å delegere fordelinga av midlane til kulturutvalet. Det er fornuftig – men det må ikkje bli eit lukka rom der dei vaksne bestemmer åleine. Ungdomsrådet har peikt på ei enkel og god løysing: felles møte mellom ungdomsrådet og kulturutvalet før endeleg fordeling. Slik får ungdom seie si meining og vere med i prosessen, samtidig som den formelle avgjerda ligg der ho skal.
Ungdomsrådet foreslår også å ta med faktorar som oppmøte og aktivitet når midlane skal fordelast, og å sette eit øvre tak per klubb. Det er forslag som både gir rettferd og insentiv til å skape levande klubbtilbod. Med slike konkrete og konstruktive innspel viser ungdomsrådet at dei er klare til å ta ansvar. Då bør vi som folkevalde også ta ansvar – og gi dei reell medverknad.
Difor kjem vi i Venstre til å foreslå i kommunestyret at ungdomsrådet skal vere med og bestemme når midlane til ungdomsklubbane skal fordelast. Det handlar om respekt. Det handlar om demokrati. Og det handlar om å bygge tillit mellom unge og kommunen.
Skal vi ta ungdom på alvor, må vi også gi dei ei stemme der det tel.
Christian Holstad Lilleng
Gruppeleiar Haram Venstre