I tillegg til bedriftsbesøka hadde vi stand i Askvoll, Bulandet og Stongfjorden. I Askvoll var båten 18. august, i Bulandet 21. august og Stongfjorden fekk æra av å få siste stopp på turneen, torsdag 3. september. I tillegg var Gunvald på paneldebatt i Askvoll onsdag 26. august.
M/S Valfisk og mannskapet har vore 30 dagar på tur og besøkt 24 kommunar. Berre to kommunar i fylket kan ikkje nåast med båt. Det er klart at vi i Askvoll synes det var kjekt å få båten hit tre gongar og i Stongfjorden klarte vi sette prikken over i’en for turneen. (Synes sjølvsagt vi i Askvoll Venstre då)
Dagen starta med prat med ferjemannskap i Askvoll, før vi sette kursen mot Stongfjorden. Her vart vi motteken av lokale Venstre folk og ikkje minst vår eigen kandidat på lista, Gunhild.
Første besøket tok vi til Flokenes Fiskefarm. Her fekk vi innblikk i deira utfordringar og ikkje minst korleis utbygginga av Engabøfeltet i Vevring kan påverke deira kvardag. På Stongfjorden Mekaniske fekk vi sjå folketurbinen. Etter desse to besøka var det stand utanfor butikken – vaflar og kaffi vart servert og mange hadde tatt turen ut i fineværet.
Når butikken stengte gjekk turen til Sunnfjord Geosenter og Hønsehagen Vinkjeller. I lyse kontor- og konferanselokale fekk mannskap og gjestar ei presentasjon av konseptet til Lindgren/Alsaker – og etter presentasjonen gjekk turen ned i kjellaren deira: Hønsehagen vinkjeller. Her fekk vi servert eit stort og godt måltid med godt tilbehør. Saman med mannskap og lokale Venstrefolk hadde vi ei fin avslutting på tre besøk i Askvoll og for mannskapet sin del: Ei fin avslutting på 30 dagar på kjøl.
Sjekk heile turneen til M/S Valfisk på www.msvalfisk.wordpress.com og litt av bildedokumentasjonen frå stoppa i Askvoll: Takk for tre flotte besøk hos oss i Askvoll!
