– Me vedtok mange tiltak i valprogrammet som vil bety mykje for Voss og indre Hardanger, seier Terje Breivik. Ikkje minst at Ringeriksbanen vart ein del av InterCity-utbygginga. På den måten kan me verkeleg få redusert reisetida mellom Oslo og Bergen, seier Breivik, som også er nestleiar i Venstre. Breivik er som kjent svært oppteken av Bergensbanen, Ringeriksbanen og regional utvikling i indre strok av Hordaland, så vel som i Bergen. Terje Breivik peiker også på vedtaket om ny kyststamveg(E 39) som ei viktig sak for Vestlandet og Hordaland.
– Eit anna viktig område er næringspolitikk, seier Knut Olav Nestås, leiar i Voss Venstre og landsmøtedelegat frå Hordaland. – Noreg treng ei storsatsing på verdiskaping og nyskaping for å sikra velferda. Det krev mange nye bedrifter, og ei betre tilrettelegging for innovasjon i det etablerte næringslivet, seier næringspolitikaren frå Voss.
Breivik og Nestås kjem med forenkling og mindre byråkrati, sosiale rettar for sjølvstendig næringsdrivande, målretta skatte- og avgiftspolitikk, og ikkje minst betre tilgang på risikovillig kapital, som sentrale stikkord frå Venstre sitt nye program. – Alt dette vil vera svært viktig for bedrifter som satsar i vår region, påpeiker Breivik og Nestås.
Sjå også sak i avisa “Hordaland” for tysdag 16. april.