“Kjekt å sjå at det nyttar med lokalpolitisk arbeid, og at det er kort veg frå lokalmiljøet til Stortings- og regjeringskontora.” Dette seier ein tilfreds Hallvard Bjørneset – ordførarkandidat for Venstre i Volda – etter gladmeldinga onsdag om at regjeringa løyver 3 mill kroner til ombygging og modernisering av det gamle Strøm-auditoriet på Høgskulen i Volda.
“Eg vil spesielt framheve arbeidet til forskings- og utdanningsminister Iselin Nybø (V) som har fått støtte i regjeringa til å auke løyvingane til ulike tiltak som skal betre undervisninga på universitet og høgskular kring om i landet. Noko som altså kjem vår lokale høgskule til gode”, seier Bjørneset. Han legg til at det er første gongen at Høgskulen i Volda får tildelt slike midlar, då det tidlegare ikkje vart gitt midlar til høgskular og universitet som leiger lokale av Statsbygg. Desse kriteria har no statsråd Nybø – som vitja Høgskulen i Volda seinast i april – endra.
Saman med lokale representantar frå dei andre regjeringspartia, kunne Bjørneset i går presentere gladmeldinga til rektor Johann Roppen og dekan Odd Ragnar Hunnes på Høgskulen. Midlane skal gå til ombygging av det 25 år gamle Strøm-auditoriet for meir studentaktiv undervisning og læring. Målet er å heve kvaliteten på undervisninga og gi studentane meir og betre læring og eit rikare læringsmiljø m.a. ved å nytte teknologi til å veksle mellom plenumsplenpresentasjonar og arbeid i grupper. Prosjektet har såleis fått kallenamnet “Veksel-Strøm.”
