Skei Grande var på sommerturne gjennom fylket som en del av oppladningen til haustens valkamp, men vart brått avslutta grunna den tragiske hendinga på Utøya og i regjeringskvartalet. Onsdag og torsdag fekk ho besøke bedrifter i Florø og Askvoll og var med på sommarfest på Mo folkemuseum saman med lokallaga Førde, Askvoll, Naustdal, Gaular og Jølster.
Naustdal Venstre sin ordførarkandidat Øystein Djupvik og fylkesordførarkandidat Marit Barsnes Krogsæter var vertskap for Grande på turen gjennom Naustdal kommune. Dei ankom Vevring i båt og blei møtt av ei stor folkemengde med Arne Underlid og Anne-Line Thingnes Førsund frå Vevring og Førdefjorden miljøgruppe i spissen. Ei lyttande og interessert Trine Skei Grande fekk ei grundig innføring i dei miljømessige konsekvensane av å deponere 250 millionar tonn grus, sand og støv sammen med svovelsyre og andre kjemikaliar i den nasjonale laksefjorden.
Ordførarkandidat Øystein Djupvik har arbeidd iherdig for å utsette behandlinga av Engebøsaka i kommunestyret dei siste månadane og på spørsmål frå forsamlinga om han også vil arbeide mot etableringa av fjordeponiet var det klare svaret fra Djupvik: -Ja.
Trine Skei Grande ser de lokale og prinsipielle utfordringane med fjordeponi og vil ta saka vidare:
– Dette er ei svært viktig og stor miljøsak som ikkje åleine kan overlatast til ein liten kommune å behandle. I slike saker er det viktig å ha eit vidare perspektiv enn berre økonomiske gevinstar. Vi må gjere politiske val som også våre oldebarn ein gong i framtida kan sjå tilbake på å seie at dette var gode og kloke val. Noreg er eit av ytterst få land i verda som framleis tillet deponering i sjø, og Venstre har på Stortinget utfordra regjeringa på konsekvensane for miljø og laksebestanden ved å etablere Nord-Europas største avfallsplass i en nasjonal laksefjord, sier Venstre-leiar Trine Skei Grande.